கால் வலிக்குக் காரணம் என்ன? விரைவில் குணப்படுத்துவது எப்படி?
கால் வலி திடீரென அல்லது படிப்படியாக நேரக்கூடும். இளம் வயதினர், நடுத்தர வயதினர் ஆகியோருக்கு விளையாட்டின்போது ஏற்பட்ட காயத்திற்குப் பிறகு கால் வலி ஏற்படலாம். வயதானவர்களுக்குப் பெரும்பாலும் மூட்டுகள் தேய்ந்து போவதால் அல்லது முதுகெலும்பு நரம்பில் ஏற்பட்ட காயம் அல்லது நோயால் படிப்படியாக கால் வலி உண்டாகலாம்.
காயத்திற்குப் பிறகு ஏற்படும் கால் வலிக்கான பொதுவான காரணங்களில் தசை இறுக்கம், தசைநார் கிழிந்ததால் இடுப்பு, முழங்கால் அல்லது கணுக்காலில் பாதிப்பு ஆகியவை உள்ளடங்கும். கால் முழுவதும் பரவும் வலிக்கு கீழ் முதுகில் அல்லது முதுகெலும்பில் இருந்து வரும் நரம்பு வலியும் காரணமாக இருக்கக்கூடும்.
முதுகெலும்பில் ஏற்படும் தேய்வு அல்லது காயம் இதற்குக் காரணமாக இருக்கலாம். காயத்திற்கான காரணத்தைக் கண்டறிவது முக்கியம் என்கிறார் அமெரிக்காவில் பயிற்சி பெற்று சிங்கப்பூரில் மருத்துவச் சேவை வழங்கும் முதுகெலும்பு மற்றும் நரம்பியல் வல்லுநர் டாக்டர் பிரேம் பிள்ளை.