காதலிக்க 6 மாதங்களாக வற்புறுத்தல்: விரக்தியில் பள்ளி மாணவி தற்கொலை; சிக்கியது உருக்கமான கடிதம்

முதுகுளத்தூர் சாம்பக்குளத்தை சேர்ந்த தென்னரசு மகள் சூர்யா, 17. கீழத்தூவல் அரசு மேல்நிலைப்பள்ளியில், பிளஸ் 2 படித்து வந்தார். கீழத்தூவல் அருகேயுள்ள சூரங்குளத்தை சேர்ந்த கணேசன் மகன் பாஸ்கரன் காதலிக்குமாறு, மாணவியை வற்புறுத்தி வந்தார். பாஸ்கரன் அண்ணன் சிவக்குமார், அதே ஊரை சேர்ந்த கோபால், நேரிடையாகவும், பள்ளி நண்பர்கள் மூலமாகவும், பாஸ்கரனை காதலிக்கமாறு, சூர்யாவை வற்புறுத்தி வந்தனர்.

இதுதொடர்பாக அடிக்கடி மொபைல்போனிலும் தொடர்ந்து தொந்தரவு கொடுத்தனர். விரக்தி அடைந்த மாணவி,  விஷம் குடித்து, மதுரை அரசு மருத்துவமனையில் அனுமதிக்கபட்டு இறந்தார். மாணவியின் தந்தை புகார்படி, “கடந்த ஆறு மாதங்களாக, மூவர் தொந்தரவு செய்ததால், தனது மகள் தற்கொலை செய்து கொண்டதாக புகார் கொடுத்தார். பாஸ்கரன், சிவக்குமார், கோபால் ஆகிய மூவர் மீது, கீழத்தூவல் எஸ்.ஐ., ஆனந்தராஜ், வழக்கு பதிவு செய்து விசாரித்து வருகிறார்.
இந்நிலையில் தற்கொலைக்கு முன் மாணவி எழுதிய கடித விபரம்: எனது தற்கொலை முடிவுக்கு காரணம் சிவக்குமாரும், அவரது தம்பி பாஸ்கரனும் தான். பெற்றோர் கருத்துக்களுக்கு மதிப்பளிக்காத நான், வாழ தகுதி இல்லாதவளாகிட்டேன். அப்பா, அம்மா பேச்சை கேட்காததால், நான் தவறான பாதையில் பயணிச்சுட்டேன். நான் இறந்த பின், சிவக்குமாரும், அவரது தம்பி பாஸ்கரனும் வந்தா, அடிச்சே கொன்னுடுங்க. இவ்வாறு அதில் எழுதப்பட்டுள்ளது. இந்த கடிதத்தையும் கைப்பற்றி போலீசார் விசாரித்து வருகின்றனர்.