ஹாஜிகளே வருக !
(பி. எம். கமால், கடையநல்லூர்)
உயிரோடு கபன் அணிந்து
ஒத்திகை பார்த்துவிட்டு
புதிய பிறப்பெடுத்த
புனிதர்களே வருக !
ஜம் ஜம் நீரினால்
உடலையும் குடலையும்
அலசிக் கழுவிவிட்டு
பூரண சுகத்தோடு
புறப்பட்டு வருவோரே
வருக ! வருக !!
“சரணடைந்தேன்
உன்னிடத்தில்
சமத்துவத்தின் சாகரத்தில்
சங்கமித்தேன்” என்று
சப்தமிட்டு முழங்கியவரே !
வருக ! வருக !!
கண்ணீரால் பாவத்தைக்
கழுவிக் கரைத்துவிட்டு
அல்லாஹ்வின் கருணைக்
கடலில் கலந்துவிட்ட
நதிகளே!வருக ! வருக !!
புறங்கூறும் தூசிகளைப்
புறந்தள்ளிவிட்டு நீங்கள்
கைகளில் ஒட்டியிருந்த
வட்டி நஜீசையும்
வழித்தெறிந்து விட்டீர்கள் !
இப்போது உங்கள்
நாவுகளும் கைகளும்
சுவனத்து மாளிகையின்
சுடர்விடும் தீபங்கள் !
தீபச் சுடரேந்தி
திரும்பி வருவோரே !
உங்கள்
உள்ளங்களில் மட்டுமல்ல-
இல்லங்களிலும்
சுடரேற் றுங்கள் !
ஹாஜிகளே ! நீங்கள்
உங்களையே மத்தாக்கி
ஒருவனின் திருவீட்டு
முற்றத்துக் கடலில்
அருளமுதம் கடைந்தீர்கள் !
கடைந்த அமுதத்தை
கல்புகளில் ஏந்தி
உடைந்த உள்ளத்தை
ஒ ட்டிச் சரிசெய்து
வருகின்ற ஹாஜிகளே
வருக ! வருக !
மினாவில் கல்லெறிந்து
விரட்டிய சாத்தான்
கனாவிலும் வந்து
கைகோர்க்க எண்ணுவான் !
விடாதீர்கள் ! அவனை
அனுமதித்து விட்டால்
நீங்கள்
வாங்கிய பட்டம்
வா ன த்தில் பறந்துவிடும் !
அது-
படித்து வாங்கிய பட்டமல்ல
உள்ளத்தை ஒருவனிடம்
பதித்து வாங்கிய பட்டம்
அல்லவா ?
தோல்வி மூட்டைகளைத்
தோள்களில் சுமந்துசென்று
அரபாத் வேள்வியில்
அள்ளி எறிந்துவிட்டு
வெற்றி விருதுகளோடு
விரைந்து வருகின்ற
ஹாஜிகளே ! வருக !
கள்ளி இலைகளாய்
க ஃ பாவுக்குச் சென்று
தாமரை இலைகளாய்
தரஉயர்வு பெற்று
பாவத்தில் ஒட்டாமல்
பாருகில் வாழுதற்கு
பக்குவம் பெற்றோரே
பணிவோடு வருக !
கடல்கடந்து உடல்வருத்தி
திடல் வெளியில் வியர்வை
முத்துக் குளித்து
சிப்பிகளை அல்ல
ஆணிமுத்துக்களை
அள்ளிவரு கின்றோரே
வருக ! வருக !
உல்லாசப் பயணமாய்
எண்ணாமல் ஹஜ்ஜை
அல்லாஹ்வின் வீட்டுக்கு
அருளமுத விருந்துண்ண
எண்ணிச் சென்றோரே !
ஏற்றமுடன் வருக !
ஹாஜிகளே ! நீங்கள்
சலவை செய்யப்பட்ட
வெண்ணிற ஆடைகள் !
அதில்
கடுகு விழுந்தாலும்
கடலாகத் தெரியும் !
எச்சரிக்கை !
ஜம் ஜம் சந்தனம்
ஒட்டிய கைகளை
பாவச் சாக்கடையில்
முக் கிவிடாதீர்கள் !
ஹாஜிகளே ! உங்கள்
மனவீடுகளில் மண்டிக் கிடந்த
குப்பைகளை அள்ளி
எறிந்துவிட் டீர்கள் !
இனி
தூசிகளை அங்கே
தூங்கவிடா தீர்கள் !
பிள்ளைகளாய்ப் புதிய
பிறப்பெடுத்த ஹாஜிகளே !
மழலைகளாய் மறுபடியும்
மறுவாழ்வு துவங்க
மனங்கொண்டு நீங்கள்
மகிழ்வோடு வருக !
__._,_.___
pmkamal28@yahoo.com
Tags: ஹாஜி