தியாகத் திருநாள் நல்வாழ்த்துக்கள்.

தியாகத் திருநாள் நல்வாழ்த்துக்கள்.

இசுலாமிய மார்க்கத்தில் ஒருதூதர்-யார்க்கும்

இணையில்லா இப்ராகிம் எனுந்தூதர்!

விசுவாசம் மிகக்கொண்டு வாழ்ந்தவர்-இறை

வழிபாட்டை உயிராகக் கொண்டவர்!

அசுரத்தன நம்ரூது ஆட்சியிலும் – சிறுதும்!

அச்சமின்றி இறைகொள்கை உரைத்தவர்.

இசுமாயில் எனுந்நல்ல வாரிசை – அந்த

இறையருளால் பெற்றின்பம் கண்டவர்!

இல்லாது பிறந்திட்ட பிள்ளையை – கண்ணை

இமைகாப்பது  போல்காத்த முல்லையை!

அல்லாவின் ஆசியால் நாள்தோறும் – நல்

அறிவோடும்  அருளோடும் வளர்ந்துவர!

பொல்லாத இரவொன்றில் இப்ராகிம்-நெஞ்சைப்

பொசுக்கிடும் கனவொன்றை கண்டாரே!

கல்லான பிள்ளையைதன் கையாலே

கொல்வதுபோல்  கனவொன்று கண்டாரே!

வருத்தத்துடன் தான்கண்ட கனவதனை -மன

 வலியுடனே பிள்ளைக்கு எடுத்துரைக்க!

திருவிளக்குப் பெற்றிட்ட தீபமன்றோ -இறை

தீர்ப்பாக எண்ணியே பணிந்துநிற்க!

அருமைமிகு மகனையே பலிகொடுக்க -சற்றும்

அஞ்சாத இப்ராகிம் பக்திக்கு!

பெருமைமிகு அல்லாதன் அருளாலே-பிள்ளையின்

பேருயிரை  காத்தானே நிறைவாக!

நிகழ்விதற்கு நினைவாக ஆடொன்றை -மன

நெகிழ்வோடு பலியிடவே வேண்டுமென்று!

பகர்ந்திட்ட   இறைவாக்கை  பணிந்தேற்று-இன்றும்

பக்தியுடன் நிறைவேற்றப்  படுகிறது!

மகனையே பலிகொடுக்க துணிந்திட்ட -அந்த

மாசற்ற இப்ராகிம் தியாகத்தை!

அகமாற போற்றிடும் ஒருநாளாம் – அதுவே

அருமைமிகு பக்ரீதெனும் திருநாளாம்

                                           கவிதையாக்கம்  கவிஞர்.இரா.புனிதன்✍