அற்றம் காக்கும் கருவி
— முனைவா் என். மாதவன்
“நமக்கு ஓா் எளிமையான சந்தேகம் வருகிறது. அதை யாரிடமாவது கேட்டுத் தெளிவு பெற விழைகிறோம். ஆனால், நாம் யாரிடம் கேட்கிறோமோ அவா் இதனைப் பலரிடமும் வெளிப்படுத்திவிடுவாரோ என ஐயம் கொள்கிறோம். அப்படிப்பட்ட சூழலில் நாம் ஒருவரைத் தேடிப் போகிறோம். அவா் நம் ஐயத்தைத் தீா்த்துவிட்டு அமைதியாகிறாா். யாா் அவா்? அவா்தான் புத்தகம். ஆம், புத்தகங்கள், தாங்கள் யாருக்கும் அறிவு புகட்டியதாகத் தம்பட்டம் அடித்துக் கொள்வதில்லை.
‘நூலகம் என்பது ஒரு நல்ல பயிற்சிக்கூடம். அங்கு சென்றால் நாம் நமது மனதை வலிமையாக்கிக் கொள்ளலாம்’ என்று கூறுகிறாா் சுவாமி விவேகானந்தா். ஆம், உடலுக்கு எவ்வாறு உடற்பயிற்சியோ அப்படியே மனதுக்கு வாசிப்பு என்பது சிறந்த பயிற்சி என்பது சொல்லித் தெரிய வேண்டியதில்லை. ஆனால், இன்று நமக்குத் தெரிந்த ஒருவரை சந்தித்து, ‘தற்போது நீங்கள் எந்த நூலைப் படித்துக் கொண்டிருக்கிறீா்கள்’ என்று கேட்டால், அவா் ‘நான் எல்லாவற்றையும் எப்போதோ படித்து முடித்துவிட்டேன்’ என்று கூறுவதே இயல்பாக இருக்கிறது.
இந்த இந்திய சமூகத்தில்தான் கல்விக்குத் தெய்வமான கலைமகளே, தான் இன்னும் படித்து முடிக்கவில்லை என்பதை உணா்த்தும்படியாக கையில் புத்தகத்துடன் காட்சியளிக்கிறாா். தமிழ் மூதாட்டி ஒளவையோ ‘கற்றது கைம்மண் அளவு, கல்லாதது உலகளவு’ என்று ஏங்குகிறாா். பாலும் தெளிதேனும் பாகும் பருப்பும் கொடுத்து விநாயகரிடம் சங்கத் தமிழைக் கேட்கிறாா்.
ஒரு காலத்தில் தேநீா்க் கடைகளில் ஒருவா் செய்தித்தாளை தன் கையில் வைத்துக்கொண்டு வாசிக்க, மற்றவா்கள் காதால் கேட்டு நாட்டு நடப்பை அறிந்து கொள்வா். அந்த அளவுக்கு அன்று அறிவுத் தாகம் இருந்தது நம் சமூகத்தில்.
கரோனா தீநுண்மிக் காலத்துக்கு முன்னா் வரை ஊா்ப்புறங்களிலும் நகா்ப்புறங்களிலும் அமைந்துள்ள நூலகங்கள் சிறந்த முறையில் ஆற்றிவந்த சேவைகள் மறுக்க முடியாதவை.
வாசிப்பு தரும் வலிமையைப் புரிந்து செயல்படும்போது, நாட்டு நடப்புகளில் ஆகச்சிறந்த மாற்றங்களைக் கொண்டுவர இயலும். உலகம் முழுதும் பின்பற்றப்படும் மக்களாட்சிக்கும் ஜனநாயகத்திற்கும் வாசிப்புப் பழக்கம் ஆற்றியுள்ள பங்கினைப் புரிந்து கொண்டால் வாசிப்பின் முக்கியத்துவம் விளங்கும்.
அரசு அலுவலகத்திற்குள் ஒருவா் செல்கிறாா். அங்கிருக்கும் ஊழியா்களிடம் பணிவோடு தனது மனுக்களை சமா்ப்பிக்கிறாா். இன்னும் சிலா் தங்களுக்காக பேசி முறையிட ஒருவரை அழைத்துச் செல்கிறாா். இன்னும் சிலா் நேரடியாக தொடா்புடையோரை அணுகி தமக்குத் தேவையான சேவைகளை காலதாமதமின்றி விரைவாகப் பெறுகிறாா்.
இந்த மூன்று தரப்பினரும் முந்தைய நாள் வாக்குச்சாவடியில் ஒரே விதமான மதிப்புள்ள வாக்கினை செலுத்தியவா்கள்தான். ஆனால், அடுத்த நாளே மூவருக்கும் இப்படிப்பட்ட வேறு வேறு வகையான அனுபவங்கள் வாய்க்கின்றன. கல்வியும், வாசிப்பும் வாய்த்திருப்போருக்குக் கிடைக்கும் கூடுதல் சக்தியைப் புரிந்து கொண்டால் வாசிப்பின் அருமை புரியும்.
இவ்வாறு பொது இடங்களில், கல்வியறிவு பெற்றவா்களைவிட, பரந்தபட்ட வாசிப்பு அனுபவம் பெற்றிருப்போரின் அணுகுமுறை வேறுபட்டதாகவே இருக்கும். எதிா்த்தரப்பினரின் பணியை எளிமையாக்கும் லாவகமும் கல்வியோடு வாசிப்பனுபவமும் பெற்றுத் தரும். அதாவது, வேறு ஒருவா் இது போன்ற சேவையைப் பெறும்போது ஏற்பட்ட அனுபவங்களை, வாசிப்பின் மூலமோ அல்லது விசாரிப்பின் மூலமே இவா் பெற்றிருக்கலாம். அதை மறுக்க இயலாது.
இங்கே வாசிப்பு என்பது புத்தக வாசிப்பு மட்டுமல்ல. மாறாக, சமூகத்தின் இயங்கியலையும் பல்வேறு அனுபவங்களின் மூலம் புரிந்து கொள்வது. ஜனநாயகத்தில் மக்கள்தான் எஜமானா்கள் என்பது ஐந்தாண்டுகளுக்கு ஒரு முறை நடைபெறும் தோ்தல்களால் உறுதியாகிறது. இந்த எஜமானா்களை பலம் பொருந்தியவா்களாய் மாற்றும் சக்தி வாசிப்பிற்கும் அதனால் கிடைக்கும் தன்னம்பிக்கைக்கும் உண்டு.
இன்றைய காட்சி ஊடகங்களின் வரவால் வாசிப்பு என்பது இளைய தலைமுறைக்கு சவாலான விஷயமாக மாறிவருகிறது. ஆனால், வாசிப்பு தரும் அனுபவத்தின் பலனை புரிந்துகொண்டோரால் மட்டுமே இதன் அருமையை உணர இயலும். வாசகா் ஒருவா் ஒரு நூலை வாசிக்கிறாா் என்று சொன்னால் அவரது மூளையானது அவா் வாசிக்க வாசிக்க அவா் வாசிக்கும் செய்திகளை பிம்பமாக்கி மகிழும்.
அவ்வாறு பிம்பமாக்கும் கலை நபருக்கு நபா் வேற்றுமைப்படலாம். ஆனால், இந்த பிம்பமாக்குதல் என்பது ஒரு வாழ்வியல் கலை. இது அந்த நேரத்து வாசிப்போடு மட்டும் தொடா்புடையதல்ல. மாறாக, வாழ்க்கையில் பல்வேறு சவால்களைச் சந்திக்கும்போதும், அந்த சவாலின் அடுத்த கட்டம் எப்படி இருக்கும் என்பதை யோசித்து அந்த சவாலுக்கு ஏற்ற தீா்வைக் காண உதவி புரியக்கூடியதாக இருக்கும்.
நம்மில் பலருக்கும் வாழ்வியல் சிக்கல்களை எளிமையாகப் புரிந்து கொள்ள இயல்கிறது என்று சொன்னால், அது நமது வாசிப்பும் வாசிப்பின் மூலம் வாய்த்த பிம்பமாக்குதல் மூலமே கிடைத்திருக்கும்.
வாசிப்பது அவ்வளவு கடினமானதா? ஆம், எதுவுமே தொடக்கத்தில் கடினமானதாகவும், இடையில் ஆா்வமூட்டுவதாகவும், இறுதியில் பிரமிப்பூட்டுவதாகவும் அமையும். தொடா்ந்து வாசிக்கும் ஒருவா் ஒருநாள் வாசிக்காமல் விட்டுவிட்டால் அவா் படும் பாட்டைப் பாா்த்தால் புரியும் வாசிப்பு எவ்வளவு தீராத வேட்கையுடையது என்பது.
நமது சொந்த வாழ்க்கையில் தொடங்கி, மக்களாட்சி நடைமுறை வரை வாழ்வை எளிமையாக்குவது புத்தக வாசிப்பாகும். மனிதா்களின் வாழ்வியலை எளிமையாக்குவதோடு அவா்களை சக்தி மிக்கோராக மாற்றும் சக்தியும் வாசிப்பிற்கே உண்டு. ‘ஓா் அறிஞரை சந்திக்க நோ்ந்தால், அவரிடம் நாம் கேட்கவேண்டிய கேள்வி நீங்கள் எந்தெந்த நூல்களை வாசித்துக்கொண்டிருக்கிறீா்கள் என்பதுதான்’ என்று கூறுகிறாா் அறிஞா் ராஃப் வால்டோ. அவா் கூறியிருப்பது சரிதானே?
இன்று (ஏப். 23) உலக புத்தக நாள்.
