யா முஸ்தஃபா

பிஸ்மில்லாஹிர்ரஹ்மானிர் ரஹீம்

 

1.யா முஸ்தஃபா நீர் ஆரம்பமாய் வந்த ஒளியே

( யா நபியே நீங்கள் )

அந்த ரஹ்மான் தந்த அகிலத்தாரின் அருட்கொடையே

அர்ஷ், குர்ஸி, வானம், பூமி உங்கள் ஒளியின் வழியே

நீங்கள் வரவில்லையென்றால் இந்த புவியுமில்லையே

( யா முஸ்தஃபா யா முர்தழா )

 

2. யா முஸ்தஃபா நீர் பிறந்த நாளும் திருநாளே

அது உம்மத்தவர் எல்லோருக்கும் பெருநாளே

உம்ம் புகழ்பாடி திளைப்போம் எங்கள் வாழ்நாளே

இதை மறுப்பவர் வாழும் நாட்கள் வீண் நாளே

( யா முஸ்தஃபா யா முர்தழா )

 

3.யா முஸ்தஃபா நீர் எழுதுகோலால் எழுதவில்லை

அந்த எழுதும் கோலே நீர் தான் அதனால் தேவையில்லை                   கல்விச்சாலை சென்று பாடம் எதுவும் படிக்கவில்லை

கற்றுக் கொடுத்தவன் அந்த ரப்பேதான் வேறெவருமில்லை.

( யா முஸ்தஃபா யா முர்தழா )

 

4. யா முஸ்தஃபா நீர் விண்ணைவிடவும் உயர்ந்தீரே

இலந்தை மரமும் தாண்டி இறைவனை நெருங்கி சென்றீரே

வில்லின் முனைகளை விடவும் அருகில் ரப்பை கண்டீரே

ரப்பை நாங்கள் காண தொழுகை கொண்டு வந்தீரே

( யா முஸ்தஃபா யா முர்தழா )

 

5. யா முஸ்தஃபா நீர் நற்குணத்தின் மேல் இருப்பவரே

மக்கள் செய்த அத்தனை இன்னலையும் பொறுத்தவரே

தரமறுத்தவர் கரத்தில் கஃபா சாவியை தந்தவரே

படைக்கப்பட்டவர் அத்தனை பேரிலும் நீர் தான் சிறந்தவரே

( யா முஸ்தஃபா யா முர்தழா )

 

6. யா முஸ்தஃபா நீர் முகத்தைக் காட்ட நாடுகின்றேன்

அந்த நாளும் எந்த நாளோ என்று ஏங்குகின்றேன்

எந்தன் கனவில் வந்து காட்சி தரவே வேண்டுகின்றேன்

அதை எதிர்பார்த்து ஒவ்வொரு நாளும் உறங்குகின்றேன்

( யா முஸ்தஃபா யா முர்தழா )

 

7. யா முஸ்தஃபா நீர் கவுசர் அருகில் இருக்கையிலே

நாங்கள் வருவோம் தாகம் தீர்த்திட உங்களருகினிலே

அன்று எங்கள் முடிவு இருக்கும் ரப்பின் கரங்களிலே

வேறெவருமில்லை பரிந்துரைசெய் யவ்வுலகினிலே

( யா முஸ்தஃபா யா முர்தழா )

 

இன்ஷா அல்லாஹ் தொடரும்

 

அ. முஹம்மது மஹ்ரூஃப்