நீயும் நீயும் நானாவேன்..

நீயும் நீயும் நானாவேன்.. (கவிதை) வித்யாசாகர்!

கிழித்துப்போட்ட

காகிதங்களைப் போல கிடக்கிறது
உனக்காக காத்திருந்த மனசு;

அள்ளி தீயிலிட நினைக்கிறேன்
நீயில்லா தனிமைதனில்…

——————————————————-

நீ நிலவிற்கீடு

ஒரு படி அதற்கும் மேல்..

எப்போதும் ஒளிர்ந்துக்கொண்டே யிருப்பாய்

நானந்த ஒளியின்

ஏதேனுமொரு மூலையில் நின்று

உனைத் தொட்டவாறே உயிர்த்திருப்பேன்..

——————————————————-

உயிரைவிட
எதைப் பெரிதாகச்
சொல்வதென்று புரியவில்லை;

உன்னைவிட எனலாமா..?!!

——————————————————-

மழையின்று சோவெனப்
பெய்யுமென்றுச் சொன்னால்
ஒரு விவசாயிக்கு மனசெல்லாம் பல்லாய்
சிரிப்பு வரும்;

எனக்கும் நீ இன்று
வருவாயென்று நினைக்கையில்
நினைக்க நினைக்க ஆனந்தம்..

——————————————————-

இந்தப் பிரபஞ்சம்

காற்றால் நிறைந்திருப்பதைப் போலத்தான்

நானும் உன்னால் நிறைந்திருக்கிறேன்..

என்னுலகம்

உன்னிலிருந்து துவங்கி

உன்னோடே முடிகிறது..

Most Popular