தெய்வமே தாயாவாள் !

நிலத்திலே வந்தபிள்ளை மலத்திலே கிடந்தாலும்
மனத்திலே மகிழ்ச்சியுடன் அதைச்சுத்த மாக்கிநின்று
கலத்திலே சோறிருந்தும் கவனமதில் கொள்ளாமல்
அணைத்துமே மகிழ்ந்திடுவாள் அருமைமிகு தாயாவாள் !

மார்பணைத்துப் பால்கொடுக்கும் தாயவளின் மார்புதன்னை
நோவெடுக்கக் கடித்தாலும் நோவாகாக எடுக்கமாட்டாள்
நீரருந்தி மோரருந்தி நீண்டநேரம் தான் இருப்பாள்
தன்பிள்ளை பசிபொறுக்காள் தயவான தாயாவாள் !

காய்ச்சலிலே தானிருப்பாள் களைப்புவந்து தான்படுப்பாள்
ஆசையுடன் பிள்ளைதனை அரவணைத்தல் தவிர்த்துவிடாள்
மூச்செல்லாம் முழுவதுமாய் பிள்ளையிடம் தானிருக்கும்
பேச்செல்லாம் பிள்ளையன்றி பிறிதறியாள் தாயாவாள் !