சைத்தான்கள்
==============================
தினந்தோறும் ஊடகங்கள்
புள்ளிவிவரங்களை
அவித்து அவித்து
கொட்டிக்
கவிழ்த்துக்கொண்டிருக்கின்றன.
மரணத்தின் பசி தீரவில்லை.
ஏதோ ப்ரொட்டீன் என்வெலப்
புரட்டி புரட்டிப் போடுகிறது
இந்த உலகத்தை.
பழைய பழைய ஏற்பாடுகளும்
புதிய புதிய ஏற்பாடுகளும்
இன்னும்
கருடன் காக்காய் குருவி
புராணங்களும்
அந்த வில்லனின் முகத்தை
கார்ட்டூன் உருவங்களாய்
காட்டி விட்டுப்போய் விட்டன.
மனிதனே
மனிதனை “கிருமி போஜனம்”
செய்யும் அதர்மங்கள்
அழிக்கப்பட
அந்த பத்துக்கைகளிலும்
பத்தாமல் பற்றிக்கொண்டிருக்கும்
ஆயுதங்களை வைத்துக்கொண்டு
கடவுள்கள் முழித்துக்கொண்டிருக்கின்றன.
மனிதன் படைத்த கடவுள்கள்
மனிதனோடு கூட்டணி சேர்ந்து விட்டனவோ?
மனித நேயம் காட்டு என்று
சிலுவை சுமந்த
முட்கிரீடம் சுமந்த
வரலாறு கவிழ்ந்து விட்டதுவோ?
இப்போது
முட்கிரீடம் சுமந்து வந்து
ஒரு சைத்தான்
தீண்டாமை போதிக்கிறது.
பழைய சைத்தான்களின் தீண்டாமையும்
புதிய சைத்தான்களின் தீண்டாமையும்
ஒரு கோட்டில் வந்து நிற்கின்றன.
கவசத்தை நீக்கிப்பார்த்தாலும்
மனிதனின் முகம்
இன்னும் ஒரு முக மூடிதான்.
“எல்லாரும் எல்லாமும் பெறவேண்டும்
இங்கு இல்லாமை
இல்லாமையுற வேண்டும்”
மனிதன் நன்றாகத்தான் பாடுகின்றான்.
ஆம்.
சினிமாவுக்கு வாய் அசைக்க!
Tags: சைத்தான் சைத்தான்கள்
