வன்முறை தவிர்ப்போம்

ரத்தம் , ரத்தம் , எங்கும் ரத்தம்

சடலம் .சடலம் , எங்கும் சடலம்

நன்முறையில் வாழவேண்டிய உயிர்களெல்லாம்

வன்முறையால்  வாழ்விழக்கும் கொடுமை .

மதத் துவேஷத்தால் மனிதவெடிகுண்டுகள்

மதத்தின் பெயரால் உயிர்களை  வதைத்தல்

மதம் படித்தவர்களா இவர்கள்

மதம் பிடித்தவர்கள் அன்றோ .

சத்ருக்களை வதைத்தல் ஞாயம்

சகோதரர்களையே  வதைத்தல் என்ன நியாயம் .

குற்றம் புரிவோரைக் கொன்றால் கூட பரவாயில்லை

குழந்தைகளைக் கூட கொல்லுதல் என்ன ஞாயம் .

கருணையின் வடிவாய் இருக்க வேண்டிய பெண்டிரும்

கையில் துப்பாக்கியுடன் அலைவதென்ன ஞாயம்

இனம் மாறிக் காதலித்தால் கௌரவக் கொலை .

இறைச்சி சாப்பிட்டதாய்க் கூறி இன்னொரு படுகொலை .

எழுத்தாளர்கள்  மீது மைவீசித் தாக்குதல்

இழந்து விட்டோம் நாம் மத  சகிப்புத் தன்மையை

இழந்துவிட்டோம் நாம்  தேசிய உணர்வை .

எந்த மதமும்  ஆதரிக்காத  தீவிரவாதத்தை

எந்த மதமும்  ஆதரிக்காத  மத துவேஷத்தை

எந்த மதமும்   ஆதரிக்காத இனப்படுகொலைகளை

எந்த மதமும் போதிக்காத வன்முறைகளை

என்று  கைவிடுகிறோமோ  , என்று குறைகிறதோ

என்று அகிம்சையும் , சமத்துவமும் , அன்பும் நம்மை ஆள்கிறதோ

அன்றுதான் உலகில்  அமைதி நிலவும் .

அன்றுதான் உலகம் வளர்ச்சி அடையும்.

இத்தரையில் ஜனித்த உயிரெலாம்

நித்திரை கலைந்தெழுதல் நிச்சயமில்லை -ஆகவே

நித்திலத்தில் உள்ளவரை

நித்திய கடமைகள்  தவறாது செய்குவீர்.

புத்தர் , ஏசு , நபிகள் நாயகம் ,

சித்தர்கள் , சீலர்கள் , மகான்களெல்லாம்

புத்தியிலுரைக்கச் சொன்னது போல

சத்தியம் , அஹிம்சை , அன்பு வழி நடப்போம் .

சிலேடை சித்தர் சேது சுப்ரமணியம்