‘பொற்கிழி’ கவிஞர் மு. ஹிதாயத்துல்லா இளையான்குடி
அலைபேசி : 99763 72229
மனைவி …!
யாரவள் …?
நம் உயிரின் நகல் !
நமக்கான … பகல் !
மனைவி !
நம் காரியங்களுக்கு
மருந்து !
நம் கண்களுக்கு அவளே,
எப்போதும் விருந்து !
மனைவியொரு…
மந்திரி …! – அவள்
மதிநுட்பம் வாய்ந்த
ராஜ தந்திரி !
அடுப்படிக்கும்
வீட்டு ஹாலுக்குமாய்
’ரன்’ எடுத்தே…
களைத்துப் போகும்,
கன்மணி !
சில சமயம்,
இல்லறப்படகு
கவிழப்போகும் சமயத்தில்,
துடுப்பை வைத்தல்ல,
தம் தோள்களை கொடுத்தே,
நிமிர்த்துகிறவள் மனைவி !
காலையில் எழுந்ததும், முதலில்,
நாம் முகம் பார்க்கும்
கண்ணாடி !
பாலையில்
நாம் பார்க்கும்…
பன்னீர் ஊற்று !
தாய்க்குப்பின்
நம் குடும்பச் சுமைகளை
நம்மோடு பங்கேற்க வரும்
ஆதாயம் கருதாத …
பங்காளி…. !
பிள்ளைக் கரும்புகளைப்
பெற்றுத் தரும்,
படைப்பாளி !
மனைவி…..!
நம்மோடு இருக்கும்,
ஒளி !
நமக்கென இடர்வந்தால் – அதைச்
சினமாய் சிதைக்கும்
உளி !
இன்னும் அழகாய்…
நம் வள்ளுவப் பெருந்தகை
சொல்லியிருக்கிறான்,
மனைவி நம்
வாழ்க்கைத் துணை நலமென்று !
நம் காவியக்கவிஞர் கண்ணதாசன்
சொன்னவரிகள்…
என்ன தெரியுமா…?
“ஆலம் விழுதுகள் போல் – உறவு
ஆயிரம் இருந்தென்ன…?
வேரென நீயிருந்தால் – அதில்நான்
வீழ்ந்து விடாதிருப்பேன் !” என்று
மனைவியின் அருமையை
மணக்கத் தருகிறார் !
வாழும் மூத்த கவிஞர் வாலி,
மனைவியின் பெருமையை
எளிமையாக – ஆனால்
ஏற்றமாக,
ஆதரவான வார்த்தையை
பேசி !
அருமை மிகுந்த மனைவியை
நேசி !
அன்பெனும் பாடத்தை
அவளிடம்…
வாசி !
அவளைவிடவா
உயர்ந்தது…
காசி ! என்று கேட்கிறார் !
பெற்றதாய்….
வணக்கத்திற்குரியவள் !
மனைவியோ …..
வாழ்த்துக்குரியவள் !
அவள் முகம் காணாதபோது…
அதென்னவோ
அந்தப்பொழுதுகளில்
உறைந்துபோகிறது…
என் இதய நதி !
இனிய தாம்பத்தியத்தை
ஈருடல் ஓருயிர் என்கிறது,
நம் பழங்காலப்
பழமொழி !
கணவனுக்காக….
மனைவியும்
மனைவிக்காக…..
கணவனும்
சேர்ந்தே சுவாசிக்கிற
சினேகமே
சிறந்த இல்லறமாகும் !
ஆண், பெண் இருவர்
ஒருவர்க்கொருவர்
ஆடைகளென்று … நம்
தோழமை இஸ்லாம்
தோளுயர்த்திச் சொல்கிறது !
தோல்வியில் நாம்
துவண்டு விடாமல்…
மீண்டும் எழ,
நமக்கு நம்பிக்கை
ஊட்டுகின்ற
புன்னகை நட்சத்திரமே
மனைவி !
பொறந்த வீடா ?
புகுந்த வீடா …? என்று
வருகிறபோது ..
இருவர் வீட்டையும்
இழக்க விரும்பாத
ஈர இதயம் கொண்டவள்,
மனைவி !
நல்ல மனைவி
நல்ல பிள்ளை
நல்ல குடும்பம் தெய்வீகம் என்பர் !
நல்ல குடும்பம்
பல்கலைக்கழகம் என்பது
நாடறியும்., நாம் அறிவோம்..!
குடும்பத்தில்
பிரச்சினைகளின் போது…
மனைவியோடு
சில நிமிடங்கள்
‘கவுன்சிலிங்’ செய்து கொள்கிறபோது
தெளிவான் ’முடிவு’ தென்படும் !
மனைவி என்பவள்
இறைவன் கொடுத்த
வரமென்பார்கள்…!
ஆனால் ……
சில குடும்பங்களில்
இதற்கு விதிவிலக்காய்…
அந்த வரமே…
சாபமாக அமையப் பார்த்திருக்கிறோம் !
இல்லாள் அகத்திருக்க
இல்லாதது ஒன்றுமில்லைதான் !
ஆம்,
மனைவி இல்லாமல்
சுகம் ஒன்றுமில்லை.!
தலையணை மந்திரம்
மனைவி சொல்லே மந்திரம்
என்பார்கள் ..!
எது எப்படி ஆயினும்…
மனைவி இல்லாவிட்டால் …
நாமெல்லாம்
பேச முடியாத
வெறும் இயந்திரம் தான் !
