புனித ரமலான் நோன்பு !
மனித மாண்பின் மகிழ்வு !
ஈமானோர் தீனோர் – ஈது
தேடிப்பெற்ற அருட்கொடை !
ஆராய்ந்து நாட்கள் சீராய்ந்து நோன்பை
நேராய்ந்து நோற்றோர் – நெறிநிலைப் பெற்றோர் !
கூராய்ந்து அறிவு கொள்கையில் வாழ்ந்து
கோமான் நபிகள் ஈமான் தழைக்கலானார் !
ரமளான் என்னும் புனித மாதத்தில்
ரஹ்மத் வந்திடுமே – அதன்
அமலான நோன்பு நோற்பதால் – மாண்பு
ஆனந்தம் வந்திடுமே – தீனின்
ஆன்மீகம் செழித்திடுமே !
நாற்பதில் ஒன்றினை ஜக்காத்தாய் தந்திட
நாடிடும் நோன்பாகும் – அதை
ஏற்பவர் நெஞ்சம் இனித்திடும் – தீன்
வழியின் பிறப்பாகும் !
எளியார் வாழ்வை வலியோர் உணர்ந்திட
ஏற்ற செயலாகும் – நோன்பு
தெளிவான வாழ்வை பொலிவான உயர்வை
தேடிடும் சிறப்பாகும் – உடல்
நாடிடும் நலமாகும் !
தராவீஹ் என்னும் தார்மீகத் தொழுகையின்
தத்துவம் நோன்பாகும் – அது
தந்திடும் ஆனந்தம் வந்திடும் ஆன்மீகம்
தவழ்வது நிகழ்வாகும் – அது
தானவன் மகிழ்வாகும் !
லைலத்துல் கதிர் எனும் லெளகீக இரவில்
லயித்திடும் மணமாகும் – அது
ஆயிரம் திங்களின் பிறப்பின் நிறைவை
அளிப்பது அருளாகும் – அது
அருங்குணப் பொருளாகும் !
ஷவ்வால் இளம் பிறை செவ்வானில் தெரிவது
சம்பூர்ண சிறப்பாகும் – அதில்
யெளவனம் இலங்கும் எழிலார் பெருநாள்
இணைவது மகிழ்வாகும் – வாழ்வில்
இனித்திடும் நிகழ்வாகும் !
-தமிழருவி கவிமாமணி அபிவிருத்தீஸ்வரம்
கவிநேசன்
நன்றி : மணிச்சுடர்
12/13 ஆகஸ்ட் 2012
