புத்தாண்டு வாழ்த்துக்கள்

சென்ற ஆண்டு முடியும் தருணத்தில்

இவ்வாண்டு துவங்குதற்கு மக்களிடம்

எத்தனை வாழ்த்துக்கள் , எத்தனை ஆசிகள்

எத்தனை கணிப்புகள் , எத்தனை நம்பிக்கைகள் ,

எத்தனை எதிர்பார்ப்புகள், எத்தனை திட்டங்கள்

அத்தனையும் பொய்த்தது கொரோனாவெனும்

சித்தம்கலங்கவைத்த சீனக்கிருமியால் .

வர்த்தகம் குலைந்தது ,  வருமானம் குறைந்தது

வாழ்க்கை சிதைந்தது , வையகம் ஸ்தம்பித்தது,

மரணங்களாலே மனங்கள் கரைந்தன

இயல்பு நிலை இன்னும் திரும்பியபாடில்லை ,

எத்தைத்தின்னால் பித்தம் தெளியுமென்று

அத்தனையும் செய்தும் அச்சம் தீரவில்லை.

ஓரளவு நிலைமைகள் சீரமையும் நேரத்தில்

இங்கிலாந்திலிருந்து இன்னுமொரு கிருமியால்

இன்னுமொரு ஊரடங்கு திரண்டுவரப் பார்க்கிறது .

கண்ணுக்குத் தெரியாத கிருமியால் ஓரழிவும்

கண்ணெதிரே நடக்கின்ற ஊழலால் பேரழிவும் ,

பால்மணம் மாறாப்பச்சிளங்குழந்தை முதல்

கோலூன்றும் வயதுக் கிழவிவரை யாவருக்கும்

பாலியல் கொடுமைகள் , பாவிகளால் அரங்கேற்றம் .

மதவாதம் , தீவிரவாதம், பயங்கரவாதங்களால்

நிதமிங்கே நிகழ்கின்ற நிம்மதிச்சீரழிவும்

வருமாண்டிலாவது வாராதிருக்கட்டும் .

சிறுமதிகொண்டோரின் சிந்தனைகள் மாறட்டும்

அரசியலார் திருந்தி நல்லாட்சி நல்கட்டும்

மக்கள் நலத்திட்டங்கள் மக்களை சென்றடையட்டும்.

லஞ்சம் கொடுத்துவிட்டு , தரமற்ற பணிசெய்யும்

வஞ்சகராட்டம் இந்த ஆண்டோடு ஒழியட்டும்.

பிரிவினை வாதிகளின் பிதற்றல்கள் ஒழியட்டும் .

அக்கிரமக்காரர்கள் அடியோடு ஒழியட்டும்.

தூய்மை , வாய்மை , நேர்மை , ஒற்றுமை ஓங்கட்டும்.

 அன்பு அரசாளட்டும் , அமைதி நிலவட்டும்

பண்பு உயரட்டும்  , பாரெல்லாம் மகிழட்டும் .

இந்தக் கனவாவது , இனிது நிறைவேறட்டும்.

வழக்கம்போல் புத்தாண்டு வாழ்த்துச் சொல்லிடும்

பழக்கத்தால் உரைக்கின்றேன் , புத்தாண்டு வாழ்த்துக்கள் .

அன்புடன்

சிலேடை சித்தர் சேது சுப்ரமணியம் .