Translate message

Turn off for: Tamil

பூக்காரி – பாவேந்தர் பாரதிதாசன்

 

 

 

 

சேர்த்துக் கட்டிய முல்லை வேண்டு மென்றேன்-நல்ல
சேயிழை அவள் சிரிப்பு முல்லை தந்தாள்!
பார்த்துப் பறித்த தாமரைப்பூத்
தீர்த்து விலைக்குக் கொடடி என்றேன்

பூத்த முகத் தாமரையாள்
புதுமை காட்டி மயங்கி நின்றாள் சேர்த்து…..
தேவையடி தாமரை இதழ் என்றேன்
தேனொழுகும் வாயிதழ்மலர் ஆகின்றாள்-ஒரு
பூவை  என்பேர் பூவை என்றாள்

ஆவல் அற்றவன் போல் நடந்தேன்
அவள் விழிதனில் அலரி கண்டேன் சேர்த்து….
காவல் மீறிக் கடைக்கு வந்து விழுந்து – பலர்
கண்பட வாடிய மருக்கொழுந்து நீ !

மேவா தடி என்று சொன்னேன்
வேங்கையில் ஈ மொய்க்கா தென்றாள்
தேவைக்கு மணம் வேண்டும் என்றேன்
திருமணம் என்று தழுவி நின்றாள். சேர்த்து….

கூடைமுறம் கட்டுவோர் – பாவேந்தர் பாரதிதாசன்

தொழிலாளர் விண்ணப்பம் – பாவேந்தர் பாரதிதாசன்

 

காடு களைந்தோம் – நல்ல கழனி திருத்தியும் உழவு புரிந்தும்

நாடுகள் செய்தோம்: – அங்கு நாற்றிசை வீதிகள் தோற்றவும் செய்தோம்.

வீடுகள் கண்டோம்: – அங்கு வேண்டிய பண்டங்கள் ஈண்டிடச் செய்தோம்.

பாடுகள் பட்டோம் – புவி பதமுறவே நாங்கள் நிதமும் உழைத்தோம்.

 

மலையைப் பிளந்தோம் – புவி வாழவென் றேகடல் ஆழமும் தூர்த்தோம்.

அலைகடல் மீதில் – பல் லாயிரங் கப்பல்கள் போய்வரச் செய்தோம்.

பல தொல்லையுற்றோம் – யாம் பாதாளம் சென்று பசும்பொன் எடுத்தோம்.

உலையில் இரும்பை – யாம் உருக்கிப்பல் இயந்திரம் பெருக்கியுந் தந்தோம்.

 

ஆடைகள் நெய்தோம் – பெரும் ஆற்றை வளைத்துநெல் நாற்றுகள் நட்டோம்.

கூடை கலங்கள் – முதல் கோபுரம் நற்சுதை வேலைகள் செய்தோம்.

தேடிய பண்டம் – இந்தச் செகத்தில் நிறைந்திட முகத்தெதிர் வைத்தோம்.

 

வாழ்வுக் கொவ்வாத – இந்த வையத்தை இந்நிலை எய்தப் புரிந்தோம்.

ஆழ்கடல், காடு, – மலை அத்தனை யிற்பல சத்தை எடுத்தோம்.

ஈழை, அசுத்தம் – குப்பை இலைஎன்ன வேஎங்கள் தலையிற் சுமந்தோம்.

 

கந்தை யணிந்தோம் – இரு கையை விரித்தெங்கள் மெய்யினைப் போர்த்தோம்.

மொந்தையிற் கூழைப் – பலர் மொய்த்துக் குடித்துப் பசித்துக் கிடந்தோம்.

சந்தையில் மாடாய் – யாம் சந்ததம் தங்கிட வீடு மில்லாமல்

சிந்தை மெலிந்தோம் – எங்கள் சேவைக் கெலாம்இது செய்நன்றி தானோ?

 

 

 

 

– அகரமுதல மே நாள் சிறப்பிதழ்

 

 

 

– அகரமுதல மே நாள் சிறப்பிதழ்

 

அயற் சொற்களையும்  அயல் எழுத்துகளையும் நீக்கித்தான் எழுத வேண்டும் என்றாலும் பிறரது கருத்துகளையும் பிற இதழ்கள் அல்லது தளங்களில் வந்த செய்திகளையும் மேலனுப்புகையில் அவ்வாறே பதிவதால் அல்லது அனுப்புவதால் தமிழ்த்தாயே பொறுத்தருள்க. 

அன்புடன் இலக்குவனார் திருவள்ளுவன்
அகரமுதல இணைய இதழ் www.akaramuthala.inஇலக்குவனார் இல்லம்,
23 எச், ஓட்டேரிச் சாலை, மடிப்பாக்கம்,சென்னை 600 091
மனை பேசி 044 2242 1759
அலை பேசி 98844 81652
/ தமிழே விழி! தமிழா விழி!
எழுத்தைக் காப்போம்! மொழியைக் காப்போம்! இனத்தைக் காப்போம்! /

பின்வரும் பதிவுகளைக் காண்க:

www.ilakkuvanar.com
thiru2050.blogspot.com
thiru-padaippugal.blogspot.com
http://writeinthamizh.blogspot.com/
http://literaturte.blogspot.com/
http://semmozhichutar.com