புன்சிரிப்பு பூமகனே கேளடா கண்ணே –உன்
பூர்வீகத்தை மறந்திடாது நினைந்துகொள் கண்ணே
பாபம்சேரா பாலகனே தெரிந்துகொள் கண்ணே
இருந்தநிலை மறப்பதுவே பாபமாம் கண்ணே
சிறந்தநாமம் சூட்டியுலகு அழைத்திடும் கண்ணே – அந்த
நாமமதில் உறைந்தயொன்று நீயல்ல கண்ணே
நாமரூப பேதமில்லா உயர்பொருள் கண்ணே – நீ
நாமமதில் அடங்கிடாத மறைபொருள் கண்ணே
அனுபவிக்கு யாவையுமே ஆய்ந்துபார் கண்ணே – அதில்
ஆன்மீக விளக்கங்கள் கிடைந்திடும் கண்ணே
தெளஹீதின் தெளிவில்நீ லயித்திடு கண்ணே – என்றும்
லெளஹீக வாழ்விலும்நீ ஜெயித்திடு கண்ணே
பார்ப்பதிலே பரமனையே பார்த்திடு கண்ணே – உன்
கேள்வியுணர்வு இவையணைத்தும் வேறல்ல கண்ணே
அகமியத்தை சுமந்தவர்கள் உயிரடா கண்ணே – உன்
உயிரைவிட உணர்வைவிட மேலடா கண்ணே
நல்லகமதிலே இடம்பிடிக்க அலைந்திடு கண்ணே – இந்த
ஜெகமதிலே வேறுயர்வு ஏதடா கண்ணே
கொடும்நாற்றக் கூட்டங்களை வெறுத்திடு கண்ணே – அதை
கடும்சீற்றத்துடன் என்றும்நீ எதிர்த்திடு கண்ணே
இறையின்பகைகள் விரைவிலேயே அழிந்திடும் கண்ணே -நம்
மறையின்நாதர் புகழெங்கும் விளங்கிடும் கண்ணே
இதயத்தூதர் அகமியத்தை விளங்கிடு கண்ணே – அதில்
உதயமாகும் உண்மையில்நீ நிலைத்திடு கண்ணே
-ஜே.எம்.பாட்ஷா
எழுதியது : 2002
