சிராஜுல் மில்லத் ஏ.கே.ஏ.அப்துஸ் ஸமது சாஹிப் 10 –ம் ஆண்டு நினைவு நாள் 11-04-09
சிராஜுல் மில்லத் அவர்களுக்கு கவிதைப் பூக்களால் பிரார்த்தனை
தொகுப்பு – ஆலிமான் ஆர்.எம். ஜியாவுதீன்
–எழுத்தரசு ஏ.எம்.ஹனீப்
சிறகில்லாமல் பறந்து போன
சிராஜுல் மில்லத் செம்மலே !
அறிவொளி பரப்பும் மணிச்சுடராக
அன்பை வழங்கிய வள்ளலே !
கபருஸ்தானில் மறைந்தபோதிலும்
கல்புஸ்தானில் வாழுகிறார்.
காதர் மொகிதீன் தலைமையிலே – நம்
கட்டுப்பாட்டுக்கு வாழ்த்துகிறார்
தலைவரே !
உங்களின்
தெவிட்டாத செந்தமிழ்ப் பேச்சு
எங்கள் செவிகளில்
மரணித்துவிட வில்லை ….
எங்களின்
அரசியல் பயணம்
தொடர்ந்து கொண்டுதான் இருக்கிறது
ஆம்!
உங்களின் வழிகாட்டுதல்
மரணித்துவிட வில்லை…..
–கவிஞர் இஸட். ஜபருல்லாஹ்
வாழிய சிராஜுல் மில்லத் !
வாழிய அமீனுல் உம்மத்
வாழிய அப்துஸ் ஸமது
வல்லவன் அருளைக் கொண்டே
ஊழியம் செய்து (உ) வந்த
உன்னத நெஞ்சே வாழ்வில்
நாழிகை தோறும் செய்த
நன்மையுள் என்றும் வாழ்க !
–ஏம்பல் தஜம்முல் முஹம்மது
அன்புப் பெட்டகமே
அறிவுக் கருவூலமே
சிராஜுல் மில்லத்தே
நும் நினைவில்
எம் பயணம்
என்றும் தொடரும்
–வடக்குகோட்டார் வ.மு. செய்யது அஹமது
சோபனச் சுரங்கமே ! – எங்கள் சொப்பன அரங்கமே
சேமச் சிகரமே ! சிராஜுல் மில்லத்தே !
இன்றைய அரசியலுக்கு நேற்றைய வழிகாட்டியே !
உங்கள் புகழ் நாரின் பூக்களல்ல
நட்சத்திரப் பூக்கள் என்றும் உதிராதவை உயர்ந்தவை !
–தத்துவக் கவிஞர் இ. பதுருத்தீன்
பிழை சேரா நபிவழியைத் தொடர்ந்தவர் ! – என்றும்
பிறைக்கொடியைப் புகழ்க் கொடியாய்
தலைநிமிர வைத்தார்
கலைநோக்கு கவிதைத் திறன் –
சொல்லாற்றல் மிக்கவர் ! – அப்துஸ்
ஸமதெனும் சமுதாய விளக்கு ! – இஸ்லாம்
அமுதக் கொள்கைகளே அன்னாரின் இலக்கு !
–கவிஞர் வழுத்தூர் ஒளியேந்தி
பல்வேறு சாதனைகள்
படைத்திட்ட சாதனையாளர் !
நல்லோர்கள் நாவினிலே
நாளும் வாழும் சிராஜுல் மில்லத்
மதுப்புதுவை மாநிலத்தில்
பிறந்தபோதும்
மதுவிலக்கு கொள்கையிலே
பிடித்திருக்கும் !
எது புதுமை என்பதிலே
தெளிவிருக்கும்
என் தலைவரின் புகழென்றும்
நிலைத்திருக்கும் !
என்னவென்று எழுத்தில் சொல்ல
எப்படிதான் அழுது சொல்ல
பொன்னுடலை அடக்கம் செய்தோம்
பொறுமையுடன் பிரார்த்திப்போம் நாம் !
–கவிஞர் இக்பால் ராஜா
