கண்ணைப் பற்றியே கவிதையை எழுத
கண்ணை மூடிநான் கணநேரம் அயர
விண்ணத் தாண்டி வந்தாய்; உன்றன்
கண்ணைப் பார்த்ததில் கவிதைத் தோற்றதே!
கண்ணைக் காணவே கவிதை ஊற
மண்ணைக் காணுமுன் முழுநிலா வடிவம்
கண்ணை விட்டும் காணோம்; என்றன்
கண்ணை ஈர்த்தது கவிதைக் கண்ணே!
கருவிழிப் படலம் கண்ணின் வேலாய்
ஒருவழிச் செயலால் உள்ளம் தீண்ட
மைவிழி யாலே மெய்கவி இயற்றும்
மைவிழி யாளவள் மைவிழி எழிலே!
–அதிரை கவியன்பன் கலாம், அபுதாபி
