கவியரசர் கவிதை…..
அன்னை இந்திரா மறைந்த நாள் 30.10…..……….1984
ஏற்றுங்கள்; போற்றுங்கள்!
திங்களோர் முறைதான் பூக்கும்
சித்திர வடிவம் காட்டும்
செங்கழு நீர்ப்பூப் போல
தேயமோர் திருநாள் காண(த்)
தங்களை ஈந்தார்; அந்தத்
தலைவரை எண்ணும் நாளே
மங்கலத் திருநாள்; இன்று
வணங்குவோம் அவரை வாழ்த்த.
வெடித்தது கருவி; ஆங்கே
வீழ்ந்தது குருதி; மண்ணில்
துடித்தது ஆவி; ஆயின்
தொட்டகை விட்டா ரில்லை
பிடித்ததோர் கொடியை மார்பில்
பிணைத்தவர் மறைந்தார்; அந்த
படித்தளத் தின்மேல் தானே
பறக்கின்ற கொடியைக் கண்டோம்!
ஏற்றுங்கள் கொடியை வானில்;
ஏற்றிடும் போதே நெஞ்சில்
போற்றுங்கள் காந்தி என்னும்
புண்ணிய மூர்த்தி தன்னை;
மாற்றுங்கள் சமுதாயத்தை
மாபெரும் பரத நாட்டில்
ஆற்றுங்கள் சிறந்த சேவை;
அன்னைக்கு மகன்தான் காவல்!
இந்தியா பெற்ற வாழ்வு
எவரெவர் கைக்கோ சென்று
சந்தியில் நின்றார் மக்கள்
தாயகம் நினைவா ரில்லை
இந்திரா என்னும் சக்தி
எழுந்தது முதலே வாழ்வில்
இந்தியா உயர்ந்த தென்று
எல்லோரும் பண்பா டுங்கள்!
-கவியரசு கண்ணதாசன்.
