( முதுவைக் கவிஞர் மௌலவி ஏ. உமர் ஜஹ்பர் மன்பயீ )
அல்லாஹ்வின் அருளுக்கு அளவில்லை என்பார்கள் !
அஃதே தான் இப்பொழுது அரங்கேற்றம் ஆகிறது !
நில்லாத புகழுடைய அல்லாஹ்வின் அருளாலே
நிஃமத்தாய் நிற்கின்றார் “எம்-டி காக்கா” ஸ்லாஹுத்தீன் !
“மாமிலாத்தா” நாச்சியாரின் சிப்பியிலே பூத்தமுத்து !
மகிமையுடன் “கண்ணாடி வாப்பா” அப்துல்ஹமீத் வார்த்தமுத்து !
பூமணக்கும் “கொழும்புக்குடம்” ஷேக்கப்துல் காதர் பெற்ற
பெண்ணரசி “நஜீமா” வை வாழ்க்கையில் சேர்த்த சொத்து !
தகைமையுடன் “ப்ரவசி பாரதிய சம்மன்” என்னும்
தலைசிறந்த தொழிலதிபர் பட்டயத்தைப் பெற்று நிற்கும்
மிகையுடைய பாரதத்தின் மிடுக்கான புகழ்மகனே !
மாண்புமிகு குணமகனே ! “மகிமைக்கரைக்” குடிமகனே !
இந்தியத்தாய் ஈன்றெடுத்த ‘ஞானக்கனி’ கலாமுடைய
ஏற்றமிகு கரங்களினால் பட்டமிதைப் பெற்றதனால்
இந்தியர்கள் மட்டுமல்ல ஏற்றமிகு நாட்டவரும்
இதயத்துள் உமைவைத்துப் போற்றுகிறார் ! புகழுகிறார் !
தோன்றினால் புகழோடு தோன்றும்படி வள்ளுவனோ
தூரிகையில் வடித்தபோதே தோன்றிவிட்டாய் பெருமகனே !
ஆன்றோர்கள் சான்றோர்கள் அனைவருமே போற்றுகிற
ஆற்றல்பல பெற்றாயிரம் ஆண்டுபல வாழியவே !
காசுக்கும் பணத்துக்கும் பதவிபட்டம் வாங்குகிற
காலமிதில், இப்பதவி உம்மடியில் விழுந்தபோது
நேசமுடன் ஏற்றுநிற்கும் தகுதிமிகு தலைமகனே !
நீர்வாழ்க ! உம் நிழலில் ‘அஸ்கானின்’ புகழ் வாழ்க !
