தற்பெருமை முசீபத்துகளை கொடுக்கும், சொர்க்கத்தை தடுக்கும்!

தற்பெருமை முசீபத்துகளை கொடுக்கும், சொர்க்கத்தை தடுக்கும்!

நபி மூஸா(அலை) அவர்களின் காலத்தில் வாழ்ந்த இஸ்ரவேலர் சமூகத்தை சார்ந்த காரூனின் தற்பெருமை குறித்தும் அவன் அழிக்கப்பட்ட சம்பவம் குறித்தும் அல்குர்ஆனின் அல்கஸஸ் என்ற சூராவில் 76 முதல் 82 வது வசனம் வரை அல்லாஹ் விவரித்துள்ளான்.

காரூனுக்கு அல்லாஹ் கொடுத்த கணக்கிலடங்காத செல்வங்கள் பற்றி சொல்லும் போது அவனது பொக்கிஷ பெட்டகத்தின் சாவியை மட்டுமே பல நூறு பேர் கொண்ட கூட்டம் சேர்ந்து தூக்கினால் மட்டுமே அந்த சாவியை கொண்டு காரூனின் பெட்டகத்தை திறக்க முடியுமாம்.

ஆடம்பர மாளிகைகளும் தங்க ஆபரணங்களும் பெரு மலையாய் குவிந்திருந்தன காரூனிடம். அதைக் கொண்டு இந்த பூமியில் நன்மையை செய்து நாளை மறுமைக்கான நற்கூலிக்கு உன்னை தயார் செய்துகொள் என்று காருனுக்கு நபி மூஸா(அலை) அவர்கள் மூலம் அல்லாஹ் எச்சரிக்கை செய்தான்.

நபி மூஸா(அலை) அவர்களைப் பார்த்து எனது அறிவைக் கொண்டும் திறமையைக் கொண்டும் நான் தேடிய செல்வங்கள் இவையென்று காரூன் பெருமையடித்தான். இவனது பெருமையைக் கண்ட இறைவன் ஓ…காரூனே, உனக்கு முன்னால் வாழ்ந்த சமூகத்தாருக்கு உன்னிடம் இருப்பதை விட பல மடங்கு செல்வத்தை நாம் கொடுத்து சோதித்தோம் என்று எச்சரித்தான்.

ஆனாலும் காரூன் தனது பெருமையை கைவிடவில்லை, முடிவில் ஒரு பெரும் சப்தத்துடன் பூமியை பிளக்கச் செய்து அதில் காரூனையும் அவனது ஆடம்பர மாளிகைகள்,தங்க ஆபரணங்கள்,செல்வங்கள் அனைத்தையும் புதைத்து விட்டான்.(புதையுண்ட இடத்தின் புகைப்படம் இணைத்துள்ளோம்)

மாலை நேரத்தில் காரூனின் செல்வத்தை கண்ட மக்கள் அதிகாலை எழுந்து பார்த்த போது அதன் தடயமே இல்லாது கண்டு அதிர்ச்சியடைந்தனர். நல்லவேளை அல்லாஹ் நம்மை காப்பாற்றி விட்டான் என்று தமது இறைவனுக்கு நன்றி பாராட்டினர்.

காரூனின் செல்வத்தில் பலகோடியில் ஒரு பங்கு கூட இல்லாத இன்றைய அம்பானி,அதானி,டாட்டா,பிர்லா குறித்தெல்லாம் நாம் சிலாகித்து சொல்கிறோம்.இத்தகைய பணக்காரர்களின் செல்வத்தில் கோடியில் ஒரு பங்கு கூட இல்லாத நாம் நம்மிடம் இருக்கும் அற்பமான பணம் காசு,நகைகள்,நிலங்கள்,வீடுகளை கொண்டு பெருமையடிக்கிறோம்.

எல்லாம் எனது அறிவாலும்,திறமையாலும் தான் சம்பாதித்தேன் என்று இன்றைய மனிதன் ஆணவம் கொள்கிறான். இந்த ஆணவ மனிதனுக்கும், காரூனுக்கும் எந்த வித்தியாசமும் இல்லை என்பதை உணர்ந்தால் மட்டுமே இறை சாபத்தில் இருந்து இந்த மனிதன் தப்பிக்க முடியும்?

சொந்த பணத்தில் கார் வாங்கும் மனிதனை விட லோன்(வட்டி) என்னும் கடனுக்கு கார் வாங்கும் மனிதன் அடிக்கும் பெருமைக்கு அளவே கிடையாது. தன்னிடம் 10 ரூபாய் மட்டும் தான் இருக்கும் என்று தெரிந்தே தன்னிடம் பல கோடி ரூபாய் இருப்பதைப் போன்று பீலா விடும் மனிதனின் தற்பெருமை செயல் நமக்கே முகம் சுளிக்க வைக்கும்.

தன்னிடம் இருக்கும் பணத்தை வைத்து பிற மனிதனை மதிக்காத பண்பும்,அடுத்தவர்களை மட்டம் தட்டி பேசும் போக்கும் இறைச்சாபக்கேடன் காரூனின் வாரிசுகளுக்கு மட்டுமே உரியதாகும்.

யார் ஒருவர் பெருமையை தனது மேலாடையாய் அணிந்து கொள்கிறார்களோ? நிச்சயம் அந்த மேலாடை நரகத்தின் போர்வை என்பதை உறுதி செய்யட்டும். எவர் மனதில் கடுகளவு பெருமை இருந்தாலும் அவர்களுக்கு சொர்க்கம் கிடையாது என்று அண்ணல் நபி(ஸல்)அவர்கள் கூறியுள்ளார்கள்.

பெருமை கொண்டவருக்கு இவ்வுலகிலேயே பல்வேறு சோதனைகளையும் கஷ்டத்தையும் கவலைகளையும் கொடுத்து நாளை மண்ணறைக்குள்ளும் மறுமையிலும் மிகப்பெரிய வேதனையை அல்லாஹ் கொடுத்து விடுவான்.(நவூதுபில்லாஹ்) நம் அனைவரையும் தற்பெருமை என்னும் கொடிய விஷத்திலிருந்து எல்லாம் வல்ல அல்லாஹ் காப்பாற்றுவானாக ஆமீன்.
-கீழை ஜஹாங்கீர் அரூஸி.