தகுதி
16-05-2018 தேதியிட்ட “குமுதம்” வார இதழில் வெளியான,
ஒருபக்கக் கதை
தலைப்பு: தகுதி
எழுதியவர்: கவி. முருகபாரதி
_____________________________
கண்ணாடியில் முகம் பார்த்தான் மணி.
இன்று அவனுக்கு நேர்முகத் தேர்வு.
“கேடலோனியா எங்குள்ளது?” – முதல் கேள்வி.
“அது ஸ்பெயின் நாட்டின் வடகிழக்கில் உள்ள தன்னாட்சிப் பகுதி.”
“குட்..! அமெரிக்காவைக் கண்டுபிடித்து யார்..?”
“இந்தியா என்று நினைத்து, அமெரிக்க கண்டத்தைக் கண்டுபிடித்தவர் – கொலம்பஸ். அது இந்தியா அல்ல; ஒரு புதிய கண்டம் எனக் கண்டறிந்தவர் – அமெரிக்கோ வெஸ்புகி. எனவே, அவர் பெயரையே, இலத்தீன் மொழியில், பெண்பால் பெயராக்கி, வரைபடத்தில் முதலில் வெளியிட்டவர் – மார்டின் வால்ட்சிமுல்லர்.”
“அபாரம்!” தொடர் பாராட்டுகளுக்குப் பின், எழுந்தது அந்தக் கேள்வி. “முத்தன் பள்ளம் எங்கிருக்கிறது?”
“தெரியவில்லை சார்!”
“என்ன மணி சார்..? உங்க புதுக்கோட்டை மாவட்டத்தில்தான் இருக்கு. சமீபத்துல, அந்த ஊரைப்பத்தி ஒரு நாவல் கூட வந்ததே..! சரி. புதுக்கோட்டை-னு ஏன் பேர் வந்தது..?”
“சாரி சார். தெரியல.”
“உலகத்தையே தெரிஞ்சு வச்சிருக்கீங்க. ஆனால், உள்ளூர் பற்றித் தெரியல. நீங்க இந்தியப் பிரதமர் கூட ஆகலாம். ஆனால், துணை வட்டாட்சியர் ஆகும் தகுதி இல்லை.”
மணிக்கு, தன் முகம் தெரிந்தது… கண்ணாடி இல்லாமலே..!