ஒரு கருப்பைக்கு
நன்றி சொல்லச் செல்லும்
தொப்பூள் கொடிகளின் பயணமே …
ஹஜ் !
கடலைத்தேடி
நதிகள் தான் நடந்து போகும் !
ஆனால் …
மனிதக் கடலே திரண்டு – புனித
மக்காவை துல்ஹஜ் மாதத்தில்
காணப் போகிறதே … !
அது தான் ஹஜ் !
மொழிகள் பலவானாலும்
முகங்கள் சங்கமிக்கிறதே …! – அந்த
முஹப்பத்தான திருநாள் தான் …
ஹஜ் பெருநாள் !
அங்கே
ஸலாம்கள் ததும்பி வழியும் !
சமத்துவம் கைகுலுக்கும் !
சகோதரத்துவம் …
பாசக் குடை விரிக்கும் !
சந்திக்கும் இதழ்களிலெல்லாம் …
புன்னகையே – விரியும் !
அந்தச் சுவனத்தை
நினைவு காட்டும்
மக்காவும் மதீனாவும்
உலகம் இளைப்பாறும் … நிழலோ ?
வெள்ளைப் பறவைகளின்
வேடந்தாங்கலோ
கோடிக்கணக்கான
கண்கள் பார்த்தும்
கொஞ்சமும் குறையாத … அழகோ ?
இஸ்லாம் அங்கிருந்து
ஏற்றுமதியானபோது,
ஓடோடிப் போய்
இதயங்கள் வாங்கிக்
கொண்டன இலவசமாகவே …!
அதுநாள் வரை மனிதன்
தனக்காகச் சுவாசித்ததை
அன்று முதல் …
சங்கையான தீனுக்கும்
சேர்த்தே சுவாசித்தான் !
சேர்த்தே சுவாசித்தார்கள் !
வசதியானவர்களுக்கே
ஹஜ் வாய்ப்பு ! – அதுவும்
வல்ல அல்லாஹ் (ஜல்)
தான் நாடியபேர்களுக்கு
மாத்திரமே, அந்த நல்ல
வாய்ப்பை அருள்கிறான் !
ஆனால்
ஏழைகளுக்கு …?
இதுபற்றி உயர்த்தாத
புருவங்கள் இல்லை !
ஒவ்வொருவெள்ளிக் கிழமை
ஜும ஆத் தொழுகை
ஏழைகளுக்கான – ஹஜ்!
இது உலக ரட்சகனான
வல்ல அல்லாஹ் (ஜல்)
ஏழை எளியவர்களுக்காகச்
சும்மாவே தந்த அருட்கொடை !
தொழும் இடம் வேறுபட்டாலும்
இதயங்கள் நோக்குவது என்னவோ …
அந்த கிப்லாவைத் தானே !
மொத்தத்தில் ஹஜ் என்பது,
வெறும் சடங்கல்ல;- அது
மனித வாழ்க்கையின் சம்பூரணம் !
வாழ்ந்த வாழ்வின் அர்த்தம் !
அழகு என்றும் சொல்லலாம் !
இந்த வாய்ப்பு கிடைத்தவர்களே
பாக்கியவான்கள் !
வல்ல அல்லாஹ்வின் பாச முகவரிகள் !
நம் கண்மணி நாயகம் (ஸல்) அவர்களின்
நேசத்திற்குரிய பேரீத்தம் கனிகள் !
அல்ஹம்துலில்லாஹ் !
கவிஞர் மு. ஹிதாயத்துல்லாஹ்
நன்றி :
நர்கிஸ்
நவம்பர் 2011
