( ஹாஜி A. உமர் ஜஃபர் பாஜில் மன்பயீ, முதுவை )
இறைவன் அருளும் அன்பும் இணைத்து
இனிதாய் ரமலான் வருகிறது ! – அது
கறையைக் கழுகிக் குறையைத் தடுத்துக்
கோடிநல் அருளைத் தருகிறது !
கோமான் அருளைத் தருகிறது !!
துஷ்ட்டக் குருவாம் ஷைத்தான் கரத்தில்
தடையாய் விலங்கை இடுகிறது ! – அது
இஷ்ட்டப் படியிவ் வுலகில் திரியும்
இழினிலை யெல்லாம் தடுக்கிறது !
இகழ்வுகள் எல்லாம் தடுக்கிறது !!
இருளே சூழந்த நரகக் கதவை
இழுத்தே அடைத்து விரைகிறது ! – பெரும்
அருளே பொங்கும் சுவனக் கதவை
அழகாய்த் திறந்து வருகிறது !
அருளாய்த் திறந்து வருகிறது !!
இலட்சம் நலனை நம்மில் இணைக்க
(இ) “லைலத்துல் கத்ரை” த்தருகிறது ! – தூய
இலட்சியம் தேடும் பக்தர்கள் மனதில்
இலாபக் கருணை பொழிகிறது !
இலாபக் கிருபை பொழிகிறது !!
துன்பம் துயரம் விளைக்கும் வித்தைத்
தூர்த்தே அழித்து வருகிறது ! – பெரும்
இன்பம் கோடிக் கோடிகள் விளைத்து
இனிதாய் ரமலான் வருகிறது !
இன்புறு ரமலான் வருகிறது !!
ஆயிரம் ஆயிரம் பாவச் சுமையை
அழித்திட ரமலான் வருகிறது ! – பெற்ற
தாயினும் மேலாய்க் கருணை நிறைந்த
தனியோன் அருளைத் தருகிறது !
தலைவன் அருளைத் தருகிறது !!
