அல்லாஹ் உலகைப் படைக்க நாடி
அரும்பாய்ச் செய்து கமாவை
எல்லா நலனும் இம்மை மறுமை
இருக்க இயக்கி வளர்த்தானே !
நல்லார் நபிமார் இலட்சம் மேலும்
நானிலம் எங்கும் வந்ததுவும்
வெல்லும் வேதம் கமாவாலே
விளக்கும் முஹர்ரம் அருள்மாதம் !
பூவுல கெங்கும் ஹிஜ்ரீ புத்தாண்டு
பூத்து மணக்கும் புதுமை காண் !
மேவும் மனங்களில் மேன்மை பொங்க
மேலாம் தொழுகை மிளிர்வதைக் காண் !
காவும் குயிலும் காதல் இணையும்
காட்சியாய் நோன்பும் கலந்தது பார்
பாவம் போகும் பக்குவம் கூட்டிப்
பகரும் முஹர்ரம் அருள்மாதம் !
மக்கள் உரிமை ஓங்கிடப் பாரில்
மனம்திறந் தெழுந்தது ஸகாத்தும்
தக்கவன் இறையைத் தரிசித்துத் தேற
தகையாய்த் தொடர்ந்தது சீர்ஹஜ்
மிக்க ஆற்றல் மேலாய்க் காட்டும்
மிளிர்சமு தாய ஒற்றுமையும்
எக்கா லத்தும் வேண்டும் என்று
இயக்கும் முஹர்ரம் அருள்மாதம் !
அண்ணல் நபிகள் பேரர் ஹசனுசைன்
அபு பெற்றசெல்வங்கள்
விண்மண் போற்றும் ஃபாத்திமா பாலகர்
விரும்பும் அருட்கொடை உலகோர்க்கே
கண்கொளாக் காட்சி நபிகளார் தோளில்
கனிமரம் போலத் தழுவினரே !
மண்ணில் பொழிந்தது மாவிறையருளே
மலர்த்தும் முஹர்ரம் அருள்மாதம் !
சுழற்சியில் காலம் சுழன்றது பாராய்
சூழ்ந்த பாட்டர் தாய்தந்தை
விழைந்தே விட்டனர் மண்ணை விண்ணுள்
வியப்பாய் புகுந்து வாழ்கின்றார் !
அழகுச் செல்வம் அன்பர் உசைனார்
அச்சீர் மதீனத் தில்வாழ்ந்தார்
எழுந்தப் பிரச்சனை எல்லாம் சொல்லும்
எழுந்தே முஹர்ரம் அருள்மாதம் !
ஆட்சியைப் பிடிக்க யஸீத் முயன்றார்
அரியணை தன்னில் ஏறினாரே !
மாட்சிமை மிக்க உசைனார் எழுந்தார்
மனிதம் உயிர்பெறக் குரல் கொடுத்தார்
தாட்சினை இன்றித் தட்டிக் கேட்டார்
தகைஜன நாயகம் காத்திடவே
காட்சி அனைத்தும் கருத்தாய்ப் பார்த்து
கரையும் முஹர்ரம் அருள்மாதம் !
பகையாம் கழுகுகள் கூடிநின்றன
பாதகம் செய்யும் கர்பலாவில்
முகைத்தே கலைகள் முளைத்த கூஃபா
ஒவ்வோர்க் கூட்டில் பகைவலையை
மிகைத்தே விரித்திட, வாதம் புரிந்திட
விளைத்தார் படைப்போர் தொடுத்தனரே
அதட்டிக் கூறும் வஞ்சகர் கொடுமை
அறையும் முஹர்ரம் அருள்மாதம் !
அரிவையர் குழவிகள் சுற்றத் துடனே
அங்கே நின்றார் உசைனாரும்
வரிந்து கட்டிப் பகைமை முட்ட,
வழங்கும் தண்ணீர் தடுத்தனரே
பொருளும் தடுத்தார் பிறவும் தடுத்தார்
பெருக்கி விட்டார் பீதிதனை
இரவும் பகலும் பட்ட துயரை
இரையும் முஹர்ரம் அருள்மாதம் !
புத்தாண்டு நாளில் பித்தராய் ஆனார்
புலர்ந்த வெள்ளி நன்னாளில்
கத்தியை வீசிக் கழுத்தினை அறுத்துக்
களத்தில் குருதி நதிவிட்டார் !
பத்தரை மாற்றுப் பசும்பொன் குடும்பர்
பதைக்கக் கொன்றார் குழவியையும் !
இத்தரை அழியா திருக்கும் வரைக்கும்
எடுத்துரை முஹர்ரம் அருள்மாதம் !
குதிரைக் குளம்பால் மிதித்தார் உடல்களை
கோமான் உசைனார் உடம்பினையும் !
அதிரடிச் செயலால் அநியாயம் செய்தார்
அவர்தலைக் கொய்துக் கம்பொன்றில்
பதித்தார் எடுத்துச் சென்றார் பாதகர்
பண்பார் முகத்தில் அடித்திட்டார்
உதிர்ந்த ஈமான் உரமே கொள்ள
உரைக்கும் முஹர்ரம் அருள்மாதம் !
அண்ணல் நபிகள் மடியில் தவழ்ந்த
அழகு உசைனுக்கோ இது கதியா?
அண்ணல் நபிகள் முத்தம் இட்ட
அழகு முகத்திற்கோ இது விதியா?
விண்ணும் அழுதது ! மண்ணும் அழுதது !
இன்றும் நம்கண் அழவில்லையோ?
கண்ணீர் விட்டே கதறி ஈமான்
காக்கும் முஹர்ரம் அருள்மாதம் !
கொடியோர் கொடியோர் செய்தார் இழிவைக்
குவலயம் அழியும் நாள் வரைக்கும்
கெடுவார் இழிவின் கேட்டைச் சுமப்பார்
கொடுந்தீக் குணவாய் ஆகாரோ !
படுபுக ழோங்கும் உசைனாருக்கே
பாரில் ஈமான் துளிர்விடுமே !
உடுமானம்மாய்க் கலந்தார் உசைனார்
உரைக்கும் முஹர்ரம் அருள்மாதம் !
-அதிரை அருட்கவி மு. முஹம்மது தாஹா மதனீ
நன்றி : இனிய திசைகள் – டிசம்பர் 2011
